Jammer, maar ek móés dit eenvoudig net doen, want ek weet ek gaan een van die dae voorgekeer word en aangesê word om die geel nommerplate op my kar te verander na die nuwe voorgeskrewes (dis nou te sê as ek nog my kar het en die lumpen-sekretariaat dit nog nie vir gebruik in ons reënboog-rewolusie opgeëis het nie). Ek het reg van die begin af gesê ek verander die nommerplate op my kar net onder protes omdat ek die nuwes ervaar as 'n aantasting van my reg op grafiese en estetiese ordentlikheid - ek bedoel, die dag dat De Kat uiteindelik hier opdaag om 'n onderhoud met my te kom voer, hoe op dees aarde gaan ek vir hulle verduidelik hoe dié afskuwelike goed op my kar beland het?! En onthou, jy is op jou eie verantwoordelikheid as jy iemand 'n zefgat noem, OK? (Wie ookal die nuwe nommerplaat ontwerp het, verdien egter die benaming).
Zef? Zefgat? Wie kan nog dié woorde onthou? Miskien nog gop, gom, gomtor of ghwar... Sekerlik net dié van ons wat bevoorreg (of ongelukkig) genoeg was om lede van die Wie-Yt(V8)-stam in aksie te gesien het, of dit nou familie was, of bure. Dit is terme wat kom uit 'n tyd toe anders geoordeel is oor straatkultuur - tóé was straatkultuur baie duidelik sekondêr, van mindere waarde. Nou is die teenoorgestelde waar. Straatkultuur - in sy eksemplariese vorm, "thuglife" - voer nou die botoon vandat die vermaaklikheidsindustrie agtergekom het dat daar baie geld te maak is uit die eksploitering van die labiele begeertes en behoeftes van jongmense. Ernstige(r) kultuur daarenteen verg te veel moeite en die "turnover" is veel minder, sodat die "bottom line" negatief geraak word "aan die einde van die dag". (En die grap is eintlik dat "ernstige" kultuur nog altyd van straatkultuur gebruik gemaak het, maar dan in 'n verwerkte vorm - lees bietjie weer James Joyce se Ulysses). Die keuse is dus eintlik tussen straatkultuur geplaas in 'n intelligente raam aan die een kant en aan die ander kant onverdunde straatkultuur wat binne 'n kommersiële raam meeding om ons impulse en rande.
Onse angeltjie probeer iets van hierdie ommekeer vasvang in hierdie uitgawe, onder andere deur 'n onderhoud met een van die redakteurs van Ons Klyntji, "die beste tydskrif in onsuiwer Afrikaans". Ook in die ander bydraes is daar sprake van omkerings, of ten minste van strak teenoorgestelde perspektiewe, iets van ratte wat teen mekaar kras.
|
Inhoud
.......
| |
| 1. 'n Joint op Clinton | |
|
'n Onderhoud met Clinton V. du Plessis
| |
| 2. Engeltjie | |
|
'n Uittreksel uit 'n nuwe roman in voorbereiding, You Know Who I Am
| |
| 3. Ons Klyntji kom Oos-Kaap toe | |
|
'n Onderhoud met een van die redakteurs van Ons Klyntji
| |
| 4. Makanna en Ntsikana | |
|
Hoop op uitkoms
| |
| 5. Studentedigters, professors en die poësie van kampuslewe | |
|
Poëtiese perspektiewe op kennisverwerwing
| |
| 6. riskante REKLAME II | |
|
Etikette vir sensitiewes
| |
| 7. Kreatiewe skryfwoelinge in die Oos-Kaap | |
| |
|
Redakteur: Philip John
Onse angeltjie word uitgegee deur Philip John. Posbus 34942 Opinies wat in die blad uitgespreek word, reflekteer nie noodwendig die beleid van die universiteit nie. Kopiereg: Kopiereg word streng voorbehou en berus by die
outeurs.
Die kakkerlakke wat gebruik is om die grafika hierbo te vervaardig, is menslik behandel en is nooit onder enige onnodige stres geplaas nie. Tot volgende keer. | |
|
|
  | ||||||||||||||||||||||
| ||||||||||||||||||||||
